Sida 372
Cap. XV. De præfectis Septentrionalibus Regis Suetiæ
372DE BELLIS GLACIALIB.
De præfectis Septentrionalibus Regis Suetiæ.
CAP. XV.
QVEMADMODVM superius dictum est de præfectis Islandiæ, id est, terræ glacialis, qualiter edicto Regis Norvegiæ jura reddendo, lites pro portubus illius terræ motas averterent, aut inter mercatores Germaniæ flagrantes, justa pœna corriperent eo navigantes, ne vel ipsi negotiatores legitimo quæstu, vel ipsi incolæ suo commodo, vel ipse fiscus debito tributo, & omnes amœna commutationis pacifica societate privarentur: Ita & in his Finnonicis terris populosissimis, & opulentis, Regis Suetiæ præfecti, viri sagaces, & prudentes, strenui, & mansueti, vt jurgia tam indigenarum, quam alienigenarum recto justitiæ tramite auferant, & pacem vnicuique adjudicent, constituuntur. Quanto enim ferociores, austerioresque eo sub climate reperiuntur populi, (prout revera sunt ) tanto prudentioribus viris opus est, qui magis suadeant (salva justitia ) quam rigide cogant, spolient, vel tormentent: eoque casu nedum præscripta tributa alacriter exhibent, sed ad quævis imperata, etiam si periculis mortiferis annexa sint, vt eis obediant, sese promptissimos reddunt. Talibus præfectis prudentibus, justis, & moderatis, semper floruerant Aquilonaria regna cum Regibus, & principibus suis, vt suaviter recordari congruit antiqui Stenonis Sture, XXIIII. annis durissimum populum spatio bis mille Italicorum milliarium strenue, & pacifice moderantis, & rursus Regis Caroli ob avaros, contumeliosos, ac violentos omnium suarum provinciarum præfectos, VII. annis exulantis. Quid etiam cæteri ante eum Regeæ in extrema calamitate ob insatiabiles officiales passi sunt, ex annalibus eorundem ( quatenus opus fuerit: curiosus inquisitor testimonium sumat, & insuper ab externis, videlicet Caroli Magni invictissimi Imperatoris, sicuti et Alexandri Magni, ac Pompeii Magni et Constantini Magni gestis, quod eorum semper maximum augebatur imperium, & gloriosum nomen, opera prudentissimorum officialium, ac præfectorum: quorum, vtri etiam mansuetorum Pontificum, consilio & præsidentia idem Carolus Magnus vsus, austerissimam gentem Saxonicam, infinitis discordiis & ruinis attritam, constitutis optimis legibus ad optatissimam pacem, concordiam, & omnem felicem conditionem reduxit: ab qua moderno tempore non parum turbata videtur, cooperantibus impiis hominibus, per seditiosam doctrinam Lutheranorum.
I marginalen: Islandia. · Præfecti Finlandiæ. · Populus ferox mansuete regendus. · Regna floruerunt sub bonis præfectis. · Carolus magn'. · Lutherani seditiosi.
Källa: Alvin · ·



































































































































































































































































































































































































































































































































































